Infinix HOT S3 Full Details, Review and Verdict

Smartphones ki duniya mein roz ek nayi technology aati dikh rahi hai aur competition bhi behad badhta hi jaa raha hai. Pichle saal sabhi badi companies ne selfie focused smartphones ki taraf dhyaan diya aur budget range mein selfie centric smartphones dene ki koshish ke competition ko behad tough bana diya. Aise mein aaj Infinix ne bhi India mein apna pehla selfie centric smartphone launch kar diya hai jiska naam Hot S3 hai aur ye 8,999 INR mein kal se leading online retailers par available hai. 9000 INR ki kimat wala ye smartphone behad achhe specifications ke saath launch kiya gaya hai.

Design

Infinix Hot S3 ka design behad sundar hai, rounded edges ke saath aane waale is smartphone mein saamne ki taraf 18:9 display, top bezel par selfie camera, dual LED flash light aur unke beech mein in-call speaker diya gaya hai. Wahin navigation buttons on-screen dekhne ko milte hain. Rear panel par left corner mein camera aur uske thik niche flash hai aur center mein fingerprint scanner diya gaya hai.

Is mein bottom edge par micro USB port, top edge par 3.5mm audio jack hain. Wahin right edge par power button aur volume rockers diye gaye hain.

Display

Is smartphone mein 5.7 inch ki HD+ 18:9 display hai aur saath hi ise protect karne ke liye aapko box mein hi screen guard bhi mil raha hai. Viewing angles aur brightness bhi achhi hai. 1440 x 720 pixels resolution waali is display mein aap full HD tak ki videos enjoy kar sakte hain jinki detailing bhi achhi hai.  Display quality ke atirikt iska touch bhi behad responsive hai.

Camera

Hot S3 mein 13 MP ka auto focus rear camera hai jo dual LED flash light ke saath aayega. Couple of days ke istemaal ke baad ye kehna galat nahin hoga ki is price range mein 13 MP ke according iski picture quality bhi achhi hai aur detailing bhi.

Is smartphone ki highlight hai iska 20 MP ka selfie camera jo dual LED selfie flash light ke saath aata hai aur low light mein bhi aapse crisp aur natural images ka promise poora karta hai. Is 20 MP selfie camera se indoor ho ya outdoor kahin bhi behtar tasveerein li jaa sakti hain. Ismein aapko halka sa bokeh mode aur beautification mode bhi milta hai. Beautification mode mein li gayi tasveerein se jyada ched-chaad na karte huye tasveerein behad achhi aati hain. Saath hi ise 15,000 INR tak ki range ka best selfie smartphone kehna bhi galat nahin hoga.

Processor

Hot S3 Octa Core Qualcomm Snapdragon 430 processor ke saath aata hai jismein graphics bhi achhe hain. Ismein aapko 3GB ki RAM milti hai jismein se 1.5GB free hai aur 32GB ki onboard storage mein se 23GB free hai.

Ab agar iski performance ki baat karein to smartphone kaafi smooth chal raha hai, light-weight apps ke liye to aap ise best keh hi sakte hain. Saath hi humne is par heavy gaming app Asphalt Nitro ko bhi use kiya hai jiske dauraan humein kisi bhi tarah ka koi lag nazar nahin aaya. Saath hi 3-4 din ke heavy usage ke dauraan koi heating issue bhi nahin paaya gaya. 9,000 INR ki range mein HOT S3 ek aisa smartphone hai jis par heavy games bhi khele jaa sakte hain.

Battery And Software

Infinix Hot S3 mein 4,000mAh ki badi battery hai aur saath hi ise charge karne ke liye 5W ka 2 ampere ka charger bhi box mein milta hai. Heavy users ke liye ye handset full day ka battery back up de sakta hai aur yadi aap medium user hai to aapke smartphone ki battery 1.5 se 2 din tak chal sakti hai.

Is handset mein Android 8.0 Oreo OS hai.

Verdict

Infinix Hot S3 mein 9,000 INR mein aapko full view display, behtar performance, badi battery aur un sabse khaas 20 MP ka selfie camera selfie flash ke saath milta hai. Yahi nahin ye kewal features hi nahin hai, balki humne is smartphone ke usage ke baad ye jaanaa hai ki in specs ka performance bhi achha hai. 9K mein ye ek acchi deal hai.

LEAVE A REPLY

Please enter your comment!
Please enter your name here